ပညာရေး အတွေးအခေါ်

အချောင်စိတ်၊ ပညာရေးနှင့် ဒီမိုကရေစီ နိုင်ငံရေး

http://irtsociety.files.wordpress.com/2014/02/waving_children_small_dsc_0432.jpg

စာရေးသူဟာ ပညာရေး တာဝန်ထမ်းဆောင်နေတဲ့ နိုင်ငံသား တစ်ယောက်ဖြစ်ပါတယ်။ လက်ရှိအချိန်မှာ ကျောင်းသားတစ်ပိုင်း ဆရာတစ်ပိုင်းဖြစ်ပြီး ကျောင်းသားသက် (၂၅) နှစ်၊ ဆရာလုပ်သက် (၉)နှစ် ရှိခဲ့ပါပြီ။ နိုင်ငံသားတစ်ယောက်အနေနဲ့ကတော့ ရွေးကောက်ပွဲ သုံးကြိမ် (၁၉၉၀၊ ၂၀၁၀၊ ၂၀၁၂)ကို ကြုံဆုံခဲ့ဘူးပါတယ်။ စာရေးသူရဲ့ အသက်အရွယ် အတွေ့အကြုံအရ ကျောင်းသားများ စာမေးပွဲဖြေဆိုရာမှာ လက်လွတ်စပယ် ဖြေဆိုတတ်တာကို တွေ့ကြုံခဲ့ဖူးသလို ကျောင်းသားများ အတန်းခေါင်းဆောင် ရွေးချယ်မှုမှအစ နိုင်ငံသားများ လွှတ်တော်ကိုယ်စားလှယ် ရွေးချယ်မှုအထိ ပေါ့ပေါ့တန်တန် သဘောထားကြတာ တွေ့ကြုံခဲ့ရဖူးပါတယ်။ ဒီအတွေ့အကြုံတွေကို အခြေပြုလို့ စာမေးပွဲနဲ့ ရွေးကောက်ပွဲ (သို့) ပညာရေးနဲ့ နိုင်ငံ့အရေး ဆက်စပ်မှုကို ကျောင်းဆရာ အတွေးနဲ့ တွေးမိပါတယ်။

အမေး အဖြေ ပုံစံတွေ

လက်ရှိ အခြေခံပညာနဲ့ အဆင့်မြင့်ပညာ စာမေးပွဲ မေးခွန်းများမှာ ဓမ္မဓိဋ္ဌာန် (Objective type) မေးခွန်းများ ပါဝင်လျှက်ရှိပါတယ်။ အထူးသဖြင့် သိပ္ပံဘာသာရပ်များတွင် မှန်/မှား (TRUE/FALSE) မေးခွန်းများ၊ ဓမ္မဓိဋ္ဌာန် (Multiple Choice) မေးခွန်းများနဲ့ List A နဲ့ List B မှ သက်ဆိုင်ရာ အဖြေမှန်များကို ယှဉ်တွဲပေးခြင်း (Matching) စတဲ့ မေးခွန်းများ ပါဝင်ပါတယ်။ မေးခွန်းများကို မှန်ကန်စွာ ဖြေဆိုနိုင်ပါက မေးခွန်း တစ်ပုဒ်အတွက် အမှတ် (၁မှတ်) ရရှိကြပါတယ်။
ဒီနေရာမှာ မေးခွန်းများကို ကျောင်းသားများ ဖြေကြားပုံ၊ ခံယူထားတဲ့ စိတ်ထား စသည်တို့နဲ့ ပတ်သက်တဲ့ အယူအဆများကို တင်ပြချင်ပါတယ်။ ၎င်းမေးခွန်းများကို ဖြေဆိုရာမှာ အသေအချာ နားလည် သိရှိသူ ကျောင်းသားများက ကောင်းစွာ ဖြေဆိုနိုင်မှာ ဖြစ်ပါတယ်။ ဒါပေမယ့် သေသေချာချာ ဂဃနဏ မသိတဲ့မေးခွန်းများကို ဖြေဆိုရာမှာတော့ ကျောင်းသားများဟာ ရတဲ့အခွင့်အရေးကို လက်လွတ်မခံပဲ မျက်မှန်း ရမ်းဆကာ ဖြေဆိုလေ့ ရှိပါတယ်။
သေသေချာချာ ဂဃနဏ မသိတဲ့ TRUE/FALSE (သို့) Multiple Choice (သို့) Matching မေးခွန်းများကို ဖြေဆိုရာမှာ ကြုံရာ တစ်ခုခုကို မျက်မှန်း ရမ်းဆကာ (နံကြားထောက်) ဖြေတတ်ကြပါတယ်။ လက်ရှိ အမှတ်ပေး စည်းမျဉ်းများအရ မှန်ရင် အမှတ်ပြည့် ရရှိမှာ ဖြစ်ပေမယ့် မှားရင်လည်း အမှတ်လျှော့ မခံရပါ။ သို့ဖြစ်တဲ့ အတွက် ကျောင်းသားများဟာ မှန်ရင် အချောင်ရမှာမို့ မိမိတို့ လုံးဝ မသိနားမလည်တဲ့ မေးခွန်းများကို လက်လွတ်စပယ် ဖြေဆိုလေ့ရှိပါတယ်။

အချောင်စိတ်ဓာတ်အစ

ဆရာအချို့ကလည်း ဒီလိုမေးခွန်းများကို ဖြေဆိုရာမှာ တပည့်များကို “ကွက်လပ်တို့ Multiple Choice တို့ကို ဒီအတိုင်းတော့ မထားခဲ့နဲ့။ ထင်တာ တစ်ခုခုတော့ ရမ်းသန်းသာ ဖြေခဲ့။ TRUE/FALSE မှာလည်း TRUE ဒါမှမဟုတ် FALSE တစ်ခုခုကို ထင်တာသာ ဖြေခဲ့။ ကံကောင်းရင် အမှတ်ရလိမ့်မယ်” လို့ သင်ကြား ညွှန်ကြားလေ့ ရှိကြပါတယ်။
ဒီလို ဖြေဆိုတတ်ကြတဲ့ ဓလေ့ဟာ ကျောင်းသားများရဲ့ အနာဂတ်နဲ့ အရေးတကြီး ပတ်သက်နေသလို တိုင်းပြည် အနာဂတ်နဲ့ပါ တိုက်ရိုက် အချိုးကျနေမယ်လို့ ကျနော် မြင်မိပါတယ်။ ခုလို မျက်မှန်းရမ်းဆ ဖြေဆိုနေကြခြင်းဟာ အင်မတန် မှားယွင်းတဲ့ အကျင့်စရိုက်ကို မသိလိုက်မသိဖာသာ စွဲသွားစေပါတယ်။ ရရင် အချောင်ယူလိုက်မယ်ဆိုတဲ့ စိတ်ကို မသိမသာ သွတ်သွင်းပေးနေသလို ဖြစ်နေပါတယ်။ အချောင်စိတ်ဓာတ်ကို စာမေးပွဲစနစ်က အားပေးနေလျှက်ရှိပါတယ်။ ဒါကြောင့် “အချောင်စိတ်ဓာတ်အစ စားမေးပွဲက”လို့ ပြောရမလို ဖြစ်နေပါတယ်။

တာဝန်ယူမှု

ဒီနေရာမှာ ကိုယ်ယုံကြည်ရာ ကိုယ်ရွေးတာ ဘာပြောစရာရှိသလဲလို့ စောဒက တက်နိုင်ပါတယ်။ မှန်ပါတယ်။ ပညာရပ်တစ်ခုခုကို နားလည်မှု စစ်ဆေးခြင်းဟာ အလောင်းအစားတစ်ခုလို ကံဆိုးကံကောင်း စမ်းသပ်ရမယ့် ကိစ္စမဟုတ်ပါဘူး။ ဒီလို ပေါ့ပေါ့ဆဆနဲ့ ရွေးချယ်ဖြေဆိုခြင်းဟာ ကျောင်းသားရဲ့ တာဝန်ယူတတ်တဲ့ စိတ်ဓာတ်နဲ့ တာဝန်သိတတ်တဲ့ စိတ်ဓာတ်ကို ပျက်ပြားစေပါတယ်လို့ ဆိုချင်ပါတယ်။
ဒီကိစ္စနဲ့ ပတ်သက်လို့ အမေရိကန်နိုင်ငံက SAT (Scholastic Assessment Test) မေးခွန်းပုံစံကို ဥပမာ ပေးလိုပါတယ်။ ဓမ္မဓိဋ္ဌာန်မေးခွန်း (Multiple Choice Question, MCQ) များ ဖြေဆိုရာမှာ Negative Marking ဆိုတဲ့ မှားသူကို အမှတ် ပြန်နှုတ်တဲ့ စနစ်ကို ကျင့်သုံးပါတယ်။ တစ်ပုဒ် အဖြေမှန်ရင် (၁)မှတ်ရပါတယ်။ ဒါပေမယ့် မှားရင်တော့ ရွေးချယ်ခွင့် (၃)ခုပေးထားတဲ့ မေးခွန်းအတွက် အမှတ်ဝက်၊ ရွေးချယ်ခွင့် (၄)ခုပေးထားပါက (၁/၃)မှတ်၊ ရွေးချယ်ခွင့် (၅)ခု ပေးထားပါက (၁/၄) မှတ် ပြန်လျှော့ပါတယ်။ သေသေချာချာ မသိလို့ မဖြေဘဲ လွှတ်ထားခဲ့တဲ့ မေးခွန်းများအတွက်ကတော့ အမှတ် တိုးခြင်း၊ လျော့ခြင်း မရှိပါဘူး။ အဖြေကို မှန်မှန်ကန်ကန် တတ်သိနားလည် ထားသူအတွက် ထိုက်တန်တဲ့ အမှတ်ချီးမြှင့်မှု ဖြစ်သလို သေချာဂဏ မသိပဲ ရမ်းဆဖြေဆို(guesswork) မိပါက မိမိအမှားကို တာဝန်ယူစေခြင်း ဖြစ်ပါတယ်။

ဒါဟာ သေသေချာချာ ဂဃနဏ မသိပါဘဲ မျက်မှန်းရမ်းဆဖြေဆိုခွင့် (ရမ်းတုတ်ခွင့်)ကို ခွင့်ပြုမထားခြင်းပဲ ဖြစ်ပါတယ်။ ကျောင်းသားများအနေနဲ့ (၁)မှတ် ထပ်ယူမလား (သို့) အမှတ် ပြန် အလျှော့ခံမလား (သို့) မသိတာကို ရိုးသားစွာဖြင့် ဖြေဆိုမှု မပြုပဲ ထားမလား သေသေချာချာ စဉ်းစားရပါမယ်။ ကျောင်းသားဟာ မိမိ ရွေးချယ်မှု အတွက် ကိုယ်တိုင် တာဝန်ယူစေခြင်းပဲ ဖြစ်ပါတယ်။ တာဝန်သိမှု (responsibility) နဲ့ တာဝန်ခံမှု (accountability) တို့ကို ကျောင်းစာမေးပွဲကနေ စတင် လေ့ကျင့် ပေးလိုက်ခြင်းပဲ ဖြစ်တယ်လို့ မြင်မိပါတယ်။

စာရေးသူတို့ မြန်မာနိုင်ငံမှာ လက်ရှိ သုံးစွဲနေတဲ့ အမှတ်ပေးပုံ အရဆိုရင် ကျောင်းသားဟာ အဖြေမမှန်လည်း အမှတ်လျှော့ မခံရတာကြောင့် မှားလည်း ပြဿနာမရှိ။ မဖြေ့ဘဲ ထားတာနဲ့စာရင် အခွင့်အရေး ပိုကောင်းတယ်။ မှားရင် အရင်း၊ မှန်ရင် အမြတ်ပဲ၊ အချောင်ရတာပဲလို့ ခံယူနေကြပါတယ်။ ကိုယ်မသိသော အဖြေမှန်ကို မသိလဲ ရမ်းတုတ်ခွင့် ရနေပါတယ်။ ဒါဟာ ကျောင်းသားများကို အချောင်စိတ် မသိမသာ ၀င်သွားစေတယ်လို့ ဆိုနိုင်ပါတယ်။

ရွေးချယ်စရာများတဲ့ လောက

ကျောင်းသား/သူများဟာ တချိန်မှာ အခြားခြားသော ရွေးချယ်စရာများ ကြုံလာမှာ ဖြစ်ပါတယ်။ ဒီအခါမှာ စာမေးပွဲ ဖြေစဉ်ကလို ပေါ့ပေါ့တန်တန် ရွေးချယ်ကြပါက ဘ၀မှာ အခက်အခဲမျာနဲ့ ရင်ဆိုင် ကြုံတွေ့ကြရပါလိမ့်မယ်။ မျက်မှန်းရမ်းဆ ရွေးချယ်မှုတွေကြောင့် ကာယကံရှင် တစ်ယောက်အတွက်သာမက လူ့ပတ်ဝန်ကျင်၊ လူ့အသိုင်း အ၀ိုင်းကိုပါ ရိုက်ခတ်လာနိုင်တာတွေ ရှိလာပါမယ်။
အခြေခံပညာသင်ယူ တတ်မြောက်ပြီးနောက် ဘ၀မှာ ရွေးချယ်စရာများကို ဥပမာအဖြစ် တင်ပြရရင်
(၁) တက္ကသိုလ်သင် ဘာသာရပ်
(၂) အသက်မွေးဝမ်းကျောင်း (တစ်နည်း) အလုပ်အကိုင်
(၃) မိမိလက်ဝယ်ရှိ ငွေကြေးနဲ့ ၀ယ်ယူသုံးစွဲမည့် ကုန်စည်နှင့် ၀န်ဆောင်မှု
(၃) ချစ်သူရည်းစားမှ အိမ်ထောင်ဖက်အထိ စသဖြင့် ရှိပါမယ်။ ဒါတွေသာမက အခြားခြားသော ဘ၀ဆိုင်ရာ ရွေးချယ်စရာများ အများအပြား ကျန်ရှိပါဦးမယ်။

အမတ်ရွေးမှားရင်ဖြင့်

ဒါ့အပြင် လူဆိုသည်မှာ တစ်ဦးတစ်ယောက်တည်း နေတတ်သူမဟုတ်၊ အုပ်စုဖွဲ့ နေထိုင်တတ်သည့် သတ္တ၀ါ ဖြစ်ရာ မိမိနေထိုင်ရာ ရပ်ကွက်/ကျေးရွာ၊ မြို့နယ်၊ ပြည်နယ်/တိုင်းဒေသကြီး၊ နိုင်ငံ စသဖြင့် အုပ်စုအရွယ်အစား အဆင့်ဆင့် ရှိပါတယ်။ ဒါကြောင့် မိမိ နေထိုင်ရာ ရပ်ကွက်/ကျေးရွာ အုပ်ချုပ်ရေးမှူးရွေးချယ်မှုမှ အစ လွှတ်တော် ကိုယ်စားလှယ် အလယ်၊ နိုင်ငံတော် သမ္မတ အဆုံး အားလုံးကို နိုင်ငံအတွင်း မှီတင်းနေထိုင်သူ ပြည်သူအများက ရွေးချယ်ပေးကြရပါမယ်။ ဒီ လွှတ်တော်ကိုယ်စားလှယ်များကနေတဆင့် လွှတ်တော်ဥက္ကဋ္ဌများ၊ ဒုသမ္မတများနဲ့ နိုင်ငံတော် သမ္မတတို့ကို ရွေးချယ်ကြရမှာဖြစ်ပါတယ်။ ဒီကိစ္စဟာ နိုင်ငံရဲ့ အနာဂတ်နဲ့ တိုက်ရိုက် အချိုးကျလျှက် ရှိနေပြန်ပါတယ်။
ဒီလို ရွေးချယ်တင်မြှောက်ကြရာမှာ အရွေးချယ်ခံမယ့် ပုဂ္ဂိုလ်များဟာ ပါတီအသီးအသီးက ဖြစ်စေ (သို့) တသီးပုဂ္ဂလ ဖြစ်စေ ဖြစ်နိုင်ပါတယ်။ လွှတ်တော် ကိုယ်စားလှယ် ရွေးချယ်မှု ပြုရာမှာ အရွေးချယ်ခံသူများဟာ
• မည်သည့် စာရိတ္တရှိသူ လူစားမျိုး ဖြစ်သည်၊
• မည်သည့် အလုပ်အကိုင်ကို လုပ်ကိုင်သည်၊
• မည်သည့် သမိုင်းကြောင်း ရှိခဲ့သူ ဖြစ်သည်၊
• မည်သည့် နိုင်ငံရေး အယူအဆကို ကိုင်စွဲထားသူ ဖြစ်သည်၊
• အရွေးချယ်ခံရပါက ပြည်သူကို မည်သို့ အကျိုးပြုနိုင်မည် စသည်တို့ကို အခြေခံကာ စဉ်းစားရမှာ ဖြစ်ပါတယ်။
ဒီကိစ္စမှာ စဉ်းစားမှု မှန်မှ ရွေးချယ်မှု မှန်ကန်ပါမယ်။ တစ်ဦးချင်း ရွေးချယ်မှု မှန်ကန်မှသာ ရပ်ရွာမှ အစ တိုင်းပြည် ဖွံ့ဖြိုးတိုးတက်မှုထိ အကျိုးရှိနိုင်မှာ ဖြစ်ပါတယ်။ ရွေးချယ်မှု မမှန်ကန်ခဲ့ပါက ရပ်ရွာ ဒေသမှ အစ တိုင်းပြည် ဖွံ့ဖြိုး တိုးတက်မှု အထိ ကြီးမားသော ဆုံးရှုံးနစ်နာမှုများ ပေါ်ပေါက်လာနိုင်ပါတယ်။

ပညာရေး စနစ် ပြင်ဖို့လို

စာရေးသူတို့ နိုင်ငံသူနိုင်ငံသားများဟာ ဒီမိုကရေစီ စနစ်အရ ရွေးကောက်ပွဲအမျိုးမျိုးကို အကြိမ်ကြိမ် ဖြတ်သန်းကြရမှာ မလွဲဧကန် ဖြစ်ပါတယ်။ နောင်လာမယ့် ရွေးကောက်ပွဲများမှာ လွှတ်တော် အသီးသီးအတွက် ကိုယ်စားလှယ်များကို မဲဆန္ဒရှင်များက ရွေးချယ်ရာမှာ ကျောင်းသား၊ ကျောင်းသူများက MCQ မေးခွန်းများ ဖြေသလို နံကြားထောက်၊ မျက်မှန်း ရမ်းဆကာ ရွေးချယ်လိုက်မှဖြင့် အနာဂတ် နိုင်ငံတော်အရေး မတွေးဝံ့စရာ ဖြစ်ပါတယ်။ အရွေးမှားလျှင် မိမိတို့ တိုင်းသူပြည်သားများပင် အကျိုးနည်းရမှာ ဖြစ်တယ်ဆိုတာကို သတိချပ် ကြရပါမယ်။
ဒါကြောင့် ကျောင်းသားအရွယ်မှစကာ တာဝန်သိတတ်တဲ့စိတ် တာဝန်ခံတတ်တဲ့စိတ်ကိုအခြေခံတဲ့ ရွေးချယ်မှုအတတ်ကို စနစ်တကျ လေ့ကျင့် ပေးကြရမှာ ဖြစ်ပါတယ်။ အနာဂတ် ဒီမိုကရေစီနိုင်ငံရေးအတွက် ပညာရေးစနစ်ကို ခေတ်နဲ့အညီ ပြုပြင်ကြရပါမယ်။ ဒါမှသာ အနာဂတ်နိုင်ငံတော်အတွက် အရည်အချင်းပြည့် လွှတ်တော်ကိုယ်စားလှယ်များကို ရွေးချယ်ပေးနိုင်မှာ ဖြစ်ပါတယ်။ ၎င်းတို့မှတဆင့် ပြည်သူ့ အကျိုးပြု ဥပဒေများကို ပြုစု ပြဋ္ဌာန်းနိုင်မှာ ဖြစ်သလို ရွေးချယ်ခံ လွှတ်တော်ကိုယ်စားလှယ်များထဲမှ ဒုသမ္မတများနဲ့ နိုင်ငံတော် သမ္မတကို ရွေးချယ် ခန့်အပ်ကာ အစိုးရတစ်ရပ်ကို ဖွဲ့စည်းနိုင်မှာ ဖြစ်ပါတယ်။ အစိုးရကောင်းမှ တိုင်းပြည်ကောင်းနိုင်ပါမယ်။ ဒါကြောင့် လက်ရှိ စာမေး၊ စာစစ်ပုံစံမှအစ အခြားခြားသော ပြုပြင်ပြောင်းလဲသင့်တဲ့ အရာများကို ပြင်ဆင်ပြောင်းလဲကာ ပြီးပြည့်စုံသော ဒီမိုကရေစီပညာရေးစနစ်ကို စနစ်တကျ တည်ဆောက်၍ အများပြည်သူ မျှော်လင့်တောင့်တနေတဲ့ ဒီမိုကရေစီ နိုင်ငံတော်သစ်ကို တည်ဆောက်ကြရမှာ မလွဲဧကန်ပင် ဖြစ်ပါတယ်။

7 Day Daily

No.380, May 16, 2014

Powered by Bullraider.com